Coi
noni a far el fem
Me
noni, fin quando i è stadi en salute, i ga sempre taià i so prai. Mi ero en
bocia e de istà ghe devo na man con me
fradei, me papà e me zii. I prai i era tanti ma picoli e per lo pù malcomodi; i
era a volte distanti dai Stagneri anche 2-3 Km. Me nono Nato el le taieva a la
matina bonora perché l’erba l’era pù tendra e l’aria l’era fresca. El gheva el
fer da segar e tacà a la zentura el quaro
con la prea. Ogni tant el ghe deva
quatro colpi de prea alla lama e quando no la taieva pù el la bateva. El se
senteva sul prà, el ficheva la pianta
nela tera e col martel pian pian el
bateva sul filo dela lama. I prai pù
comodi e piani el le feva taiar però dala falciatrice. Mi e me nona Bepa
ariveven en t’el prà pù tardi e co la forca
treven fora l’erba, la scarmeneven pulito perché la se sughes meio. Dopo
disnar volteven el fen con la forca o
col restel de legn. Se el prà l’era vezin disneveni a cà se enveze l’era
lontan ne toleveni drio quatro paneti. El campanil de S. Anna el segneva l’ora
ma me ricordo che me nono el saeva lo stesso l’ora perché el vardea l’ombra sul
zegno che gh’è fra i Anghebeni e el
Dosso. Quel che no mancheva mai l’era en par de boze piene de cafè de
orzo e vin. I me lo deva da bever anca a mi che ero en bocia e devo dir che
l’era bòn e el caveva propi la se. Se le giornae le era bele, verso le zinque el
fem l’era zà seco. Alora el resteleveni en andane (muci longhi e bassi) e dopo empieniveni i ninzoi
de yuta maron. Zerti prai i era così erti che ghe deveni en colpo en zima e el
fem el rugoleva zò da solo. Quando i ninzoi no i era abbastanza me nono el feva
le carche co le soghe che ‘l tireva e
ligheva col spal. Se enveze el fen no
l’era seco abbastanza se feva i marei e el dì dopo se ‘l treva fora de novo. Me
nono el toleva i ninzoi su la schena e le porteva fin al careto. L’era el
careto dela Valarsa con do sole rode de legno, do stanghe longhe davanti per
tirar e en palo longo drio che ‘l postea en tera per frenar. Per tirar el
careto a cà, tante volte se ciameva el Milio Masi col so mulo. El Milio l’era
propi en personaggio; el gheva sempre el so capel su la testa e el gilè scuro
sora la camisa, le braghe de veludo e i scarponi. L’era la storia del paes
perché ghe piaseva contar i fati de sti ani, le avventure de la guera, le
tradizion. Rivadi a cà, co la carucola tireveni su el fem sulla teza. A la fin
de l’istà l’era piena fin su soto i copi. Noi boci ne rugoleveni rento en mez,
feveni i tuffi. Sul pavimento se bineva a un el fiorimine cioè le somenze dele varie erbe. Me nono el empieniva en
sac el le treva fora en tei prai.
|
|
|
|
|
|
Quaro
co la prea |
Pianta
e martel |
Spal
co la soga |
|